Satirik jazıwshı, dramaturg hám kinocenarist Muratbay Nızanovtıń “Qaraqalpaqlar” I-II kitapları boyınsha prezentaciyası ótkerildi.

• admin
• 17-November-2022
• 100

Búgin, 17-noyabr kúni, Taqıyatas rayonı Málimleme-kitapxana orayı tárepinen rayonımız aymaǵında jaylasqan Pedagogika kolledjinde satirik jazıwshı, dramaturg hám kinocenarist Muratbay Nızanovtıń “Qaraqalpaqlar” I-II kitapları boyınsha prezentaciyası ótkerildi.
Bunnan maqset, jazıwshı M.Nızanovtıń “Qaraqalpaqlar” kitabı boyınsha kitap oqıwshılarǵa tolıq maǵlıwmat beriw, kitaptı úgit-násiyatlaw, kitaptıń mazmunı, áhmiyeti boyınsha keńnen túsinik beriwden ibarat boldı. Kitap prezentaciyasına, kolledj kitapxanashısı M.Seydametova, N.Nurabullaeva qaraqalpaq tili hám ádebiyatı oqıtıwshısı, G.Matchanova pedagogika oqıtıwshısı, rayonlıq málimleme-kitapxana orayınan A.Tureniyazova, A.Vaysova, M.Kadirovlar hám 525-topar mektepke shekemgi topar oqıwshıları qatnastı. Muratbay Nızanovtıń “Qaraqalpaqlar” I-II kitabı boyınsha Málimleme-kommunikaciya texnologiyası hám sanlastırıw xızmeti baslıǵı M.Kadirov sóz etip, bunda M.Nızanovtıń 1951-jılı Kegeyli rayonında tuwılǵanlıǵı, ápiwayı isshi shańaraqta dúnyaǵa kelgenligi, 1968-1971- jılları Kegeyli rayonı M.Jumanazarov kolxozı jumısshısı, 1971-1973 jılı Ármiya sapında xızmette bolǵanlıǵı, 1977-jılı Qaraqalpaq Mámleketlik universitetin tamamlaǵanlıǵı, ol lirik bolıwdı árman etkenligi, 1980-jıldan jurnalistler awqamınıń aǵzası ekenligi, Muratbay óziniń dáslepki dóretiwshilik jolın lirikalıq qosıqlar menen baslaǵanlıǵı aytıp ótildi. Onıń, birinshi “Qaraqalpaqlar” kitabı roman-essesi qaraqalpaq xalqınıń kelip shıǵıwı, tariyxı, ótmishtegi turmıs tárizi, dástúrleri, úrp-ádeti, ótken ásirlerdegi shayırları, jıraw baqsıları, sonday-aq, xalqımız arasında keń tarqalǵan naqıl- maqallarǵa mániler, xalqımızdıń milliy taǵamları xám basqa da siz benen biz bárqulla yadda saqlap, keleshek áwladlarǵa jetkerip barıw minnet bolǵan áhmiyetli máselelerge baǵıshlanǵanlıǵı, kitaptaǵı qaraqalpaqlar ótmishinen turmıs sharayatları haqqında, eski úy-úskeneleri haqqında aytılıp, al ekinshi kitabında bolsa- kitapta Rossiya imperiyasınıń dawamı bolıp, kitapta Rossiya imperiyasınıń Xiywa xanlıǵın jawlap alǵannan keyingi qaraqalpaqlardıń «arjaq-berjaq» (oń hám sol) bolıp ekige bóliniwi, soń óz aldına respublika bolıp birlesiwi, sol dáwirdegi xalıqtıń bastan keshirgen qıyınshılıqları hám jetiskenlikleri sóz etilgenligi, sonday-aq kitapta qaraqalpaq milletine tán milliy ózgeshelikler, sol dáwirdegi awız eki xalıq dúrdanaları, shayırlar aytısı haqqında da qızıqlı maǵlıwmatlar menen oqıp tanısatuǵınlıǵı, bunnan basqa da kitapta bir qansha maǵlıwmatlar, qaraqum iyshan medresesi, qaraqum iyshan medresesindegi Berdaq shayır maqbarası, Kúnxoja shayırdıń qábiri, “Tazqara” esteligi, Xalqabad qalasındaǵı “Iyshan qala” qorǵanı haqqındaǵı maǵlıwmatlardıń jazılǵanlıǵı búgingi qatnasıwshılarǵa maǵlıwmat retinde aytıp ótildi.
Kitapxananıń Abonementler hám paydalanıwshılarǵa xızmet kórsetiw xızmeti baslıǵı A.Tóreniyazova kitapxanada kóplegen ádebiy, qaraqalpaq, qazaq, ózbek, ózbek tiline awdarmalanǵan jáhán ádebiyatı kitapları bar ekenligin, usı kitaplardan kitapxanamızǵa kelip kitap alıp oqıwların usınıs etip bildirip, kitap beriliw tártibi boyınsha túsinik berip ótti.