1-dekabr Qaraqalpaqstan Respublikasınıń Til haqqındaǵı Nızamınıń qabıl etilgen kúni múnásibeti menen «Qaraqalpaq shayırları shıǵarmaların úyrenemiz» atamasında ushırasıw keshesi bolıp ótti.

• admin
• 17-November-2022
• 92

Usı jıldıń 16-noyabr kúni Taqıyatas rayonı Ruwxıy-aǵartıwshılıq sarayında «Mámleketlik til haqqında»ǵı Qaraqalpaqstan Respublikası Nızamınıń qabıl etilgenliginiń otız úsh jıl tolıwı múnásibeti menen «Qaraqalpaq shayırları shıǵarmaların úyrenemiz» atamasında ushırasıw keshesi bolıp ótti. Keshe mıymanı Taqıyatas rayonı 1-sanlı ulıwma bilim beriw mektebi qaraqalpaq tili hám ádebiyatı páni oqıtıwshısı, «O‘zbekistan Xalq ta’limi a’lochisi» kókirek nıshanı iyesi Baymuratova Ulbosın óz sózinide oqıwshılarǵa qaraqalpaq tiliniń biybaha ekenligin, qaraqalpaq shayırları Ájiniyaz, Berdaq, Kúnxoja babalarımızdıń shıǵarmaları haqqında keńnen túsinikler berip ótti.  Keyingi miymanımız Ózbekstan hám Qaraqalpaqstan jazıwshılar awqamı aǵzası, jas shayır Sarıbaev Baxıtlı búgingi ótkerilip atırǵan keshe menen qutlıqlap ana tilimiz esaplanǵan qaraqalpaq tili haqqında pikirlerin bildirip, sóziniń juwmaǵında oqıwshılar názerine óziniń qosıq qatarların oqıp esittirdi. Bunnan soń, Málimleme-kitapxana orayınıń Málimleme-kommunikaciya texnologiyaları hám sanlastırıw bólimi qánigesi Vaysova Almagúl keshe haqqında óziniń pikirlerin bildirip, qaraqalpaq jazıwshı, shayırları haqqında tayarlanǵan prezentaciyasın kórsetti hám túsinikler berip ótti. Ushırasıw keshesinde ulıwma bilim beriw mektepleriniń Dóretiwshi-mádeniy máseleler boyınsha úgit-násiyatshıları, kitapxanashılar hám ıqlaspent oqıwshılar belsene qatnastı.