Rayonımızdaǵı Xalıq bilimlendiriw bólimine qaraslı mektep kitapxanashıları menen birgelikte oqıw seminar ótkerildi.

• admin
• 02-November-2022
• 111

Búgin, 01-noyabr 2022-jıl

“INFOLIB Ózbekstan – 2022” XI milliy Málimleme-kitapxana hápteliginiń ekinshi kúni. Rayonımızdaǵı Xalıq bilimlendiriw bólimine qaraslı mektep kitapxanashıları menen birgelikte oqıw seminar ótkerildi.  Seminarǵa, Xalıq bilimlendiriw bólimi sabaqlıqları boyınsha metodisti Bibiruza Kemalova hám barlıq mektep kitapxanashıları, Málimleme-kitapxana orayı xızmetkerleri de qatnastı.  Xalıq bilimlendiriw bólimi sabaqlıqları boyınsha metodisti Bibiruza Kemalova sózge shıǵıp, búgingi kúnde kitapxanashılıq tarawı boyınsha ámelge asırılıp atırǵan jumıslar haqqında aytıp ótti. Mektep kitapxanashılarınıń búgingi kúnde alıp baralıp atırǵan jumısları, olardaǵı kemshilik hám jetiskenlikler, mektep kitapxanasındaǵı sabaqlıq kitaplar hám ádebiy kitaplar, oqıwshılardı kitapqa bolǵan qızıǵıwshılıǵın asırıwda kitaplar kórgizbesiniń hám úgit-násiyat jumıslarınıń júdá áhmiyetli ekenligin aytıp ótti. Sonıń menen birge, Ózbekstan Respublikası Ministrler Kabinetiniń  2022-jıl 30-sentyabr kúngi “Málimleme-kitapxana oraylarında, Málimleme-kitapxana resursların esapqa alıw, fondlardı saqlaw hám esaptan shıǵarıw, tarawdaǵı ayırım ”normativ huquqıy hújjetlerdi tastıyıqlaw haqqında”ǵı 552-sanlı qarardıń  mazmun áhmiyeti haqqında túsindirip berdi.   Sonıń menen birge Málimleme-kitapxana orayınıń Fondlardı toltırıw, saqlaw hám qayta islew xızmeti qánigesi Dauletova Nargiza jańa kelgen ádebiyatlardı hám sawǵaǵa berilgen ádebiyatlardı qabıllaw, dizimge alıw(inventarizaciya) hám jámlenbe kitapqa esapqa alıw, dalolatnamalardıń dúziliwi haqqında túsinikler berip ótti. Oraydıń Paydalanıwshılarǵa xızmet kórsetiw xızmetiniń qánigesi Xalbaeva Dilfuza kitapxanaǵa kelgen jańa ádebiyatlardı katologlastırıw, bibliografiyalıq jazıwlar hámde bir jánede eki avtorlı kitaplardıń jazılıw forması haqqında  aytıp ótti. Seminar sońında, qatnasıwshılarǵa háptelik dawamında ótkeriletuǵın kitap prezentaciyaları, sáwbetlesiwler xám kórik-tańlawlar rejelestirilgenligin aytıp ótildi.