Ádebiyatshı alım, filologiya iliminiń doktorı, professor Qallı Ayımbetov hám de balalar jızıwshısı Beknazar Ernazarovtıń «Allayar Dosnazarovtıń balalıǵı» kitabı boyınsha oqıwshı jaslar menen ushırasıw keshesi ótkerildi.

• admin
• 13-October-2023
• 107

Usı jıldıń 11-oktyabr kúni Taqıyatas rayonı 4-sanlı ulıwma bilim beriw mektebi janındaǵı muzeyiniń «El xızmetinde» bóliminde usı mekteptiń ádebiyatqa qızıǵıwshı bir qatar oqıwshı jaslar menen ushırasıw keshesi ótkerildi.Ilájǵa, Ózbekstan filormoniyası Qaraqalpaqstan bólimi «qosıq hám oyın» ansambili sazendesi Tilewbay Habibullaev, Taqıyatas rayonı 1-sanlı mekteptiń muzika páni oqıtıwshısı Gulzar Jálimbetova, Taqıyatas rayonı Málimleme-kitapxana orayınıń maǵlıwmat bibliografiya xızmeti baslıǵı Jarqınay Qadırbaeva hám málimleme-kommunikaciya texnologiyası hám sanlastırıw xızmeti baslıǵı Mirbek Kadirov sonıń menen birge usı muzeydiń ilimiy xızmetkeri Jaxangir Abdijamilov qatnastı.

Muzeydiń ilimiy xızmetkeri J.Abdijamilov muzeydegi «El xızmetinde» bóliminiń usı at penen atalıwınıń sebebi, atap aytqanda el aǵası Q.Kamalovtıń ómiri, miynetleri, iskerligi haqqında túsinik berdi. Sonıń menen birge usı bólimniń «Ilimli elge nur jawar» múyeshinde jaylasqan qaraqalpaq xalqınıń ilimpazları, shayır hám jazıwshıları haqqında maǵlıwmat berip ótti. M.Kadirov, «Ilimli elge nur jawar» múyeshindegi, ádebiyatshı alım, filologiya iliminiń doktorı, professor, milliy folklor iliminiń tiykarın salıwshı, ataqlı aǵartıwshı orfografiyamızǵa eń dáslepki hárip tańlawdan baslap, mádeniyatımızdıń usı búgingi dárejesine shekem salmaqlı úles qosqan kóp qırlı talant iyesi Qallı Ayımbetov esaplanatuǵınlıǵı, ómiri hám dóretiwshiligi, qaraqalpaq folklorına qosqan úlesi, onıń ómiri dawamında ámelge asırǵan jumısları boyınsha keńnen oqıwshı jaslarǵa túsinik berip ótti.

Sonıń menen bir qatarda T.Habibullaev, Q.Ayımbetovtıń Qaraqalpaqstannıń mádeniy aǵartıw tarawlarındaǵı miynetleri bar ekenligi, Qallı aǵa óz ómirinde folklorshılardan biri ekenligi, ol kóp ǵana folklorlıq mádeniy miyraslardı yadında saqlaw uqıbına iye ekenligi, ásirese, naqıl-maqal, tolǵaw, ańız, kúldirgi sózler, anekdotlar Qallı aǵanıń súyikli janrı ekenligin aytıp ótti. G. Jálimbetova dástanlardıń búgingi kúnge shekem jetip kitap bolıp basılıwında Q.Ayımbetovtıń ornı úlken ekenligi,dástanlardı jıraw hám baqsılardan jazıp alıp awız dóretpelerdi jazıp alıwı dawamında ómirin baǵıshlaǵanlıǵın, salt-dastur jırlarınıń búgingi kúnge shekem jetip keliwine usı insannıń biybaha miynetleri qaraqalpaq xalkının úlken bir mádeniy miyrasına aylanǵanlıǵın maqtanısh etip bayanlap berdi.

Búgingi iláj dawamında, J.Kadırbaeva tárepinen kitap oqıwshı balalardıń júrek túrinen orın alǵan, búgingi kúnde, qaraqalpaq ádebiyatınıń rawajlanıwına óziniń salmaqlı úlesin qosıp kiyatırǵan balalar jazıwshısı Beknazar Ernazarovtıń ómiri hám dóretiwshiligi menen tanıstırıp onıń 2023-jılı «Nókis» bilim baspasınan baslılıp shıqqan «Allayar Dosnazarovtıń balalıǵı» atlı kitabı menen tanıstırıp ótti. Beknazar Ernazarov 1954-jılı 11-avgusta Qaraqalpaqstan Respublikası Taxtakópir rayonında tuwılǵanlıǵı, miynet jolın «Qaraqalpaqstan jasları» gazetasınıń xabarshısı bolıp islewden baslaǵanlıǵın, onıń, «Aq qus», «Ministrdiń shofyorı», «Mıń qızdıń ashıǵı», «Shek», «Tań atqanda», «Dáwir nápesi» prozalıq kitapları, «Salaqbaydıń múlikleri», kitapları «Qaraqalpaqstan» baspasında basılıp shıqqanlıǵın aytıp ótti. B.Ernazarov «Allayar Dosnazarovtıń balalıǵı» degen balalarǵa arnalǵan povestinde A.Dosnazarovtıń mashaqatlı balalıqtaǵı dáwiri sáwlelengenligi, kitap awıllıq jerde qaytıs bolıp qalǵan kempirdiń waqıyası menen baslanatuǵınlıǵı, Allayardıń anası Kúnbiyke balasınıń mazası bolmay qalǵanına kúyinip qásterlewi, bunda ana-menen balanıń bir birine bolǵan meyirmanlıǵın tárepinen joqarı dárejede súwretlengenligi, kitapta Allayardıń balalıǵı, altın dáwiri, joqshılıq, jeter jetpeslikliklerge shıdap, táǵdirdiń bunday sınıwlarına kónip qıyınshılıqta jasaǵanlıǵı, qıstıń qaharman suwıǵındaǵı qıyınshılıqlar Allayardı da shetlep ótpegenligi, Allayardıń qıs kiyimi bolmaǵanlıǵı sebepli, mollaǵa qatnap oqıwın dawam ettire almay, eskishe sawattı ákesinen úyrengenligin,ol sol waqıtlarınan baslap oqıwǵa qattı qızıqqanlıǵı, ol dástanlardı oqıwǵa qattı qızıqqanlıǵı,sonıń menen birge, ashlıq dáwirlerde bolǵan waqıyalar, yaǵnıy qızıl tarı dáwirleri jazıwshı tárepinen sheberlik penen súwretlengenligi, bunda adamlar ashtan ash qızıl tarını keń dalanlıqlardan teretuǵın bolǵanlıǵı sıyaqlı qızıqlı maǵlıwmatlar sóz etiletuǵınlıǵın aytıp ótti hám B.Ernazarovtıń «Allayar Dosnazarovtıń balalıǵı» atlı kitaptı oqıwshılar oqıwların usınıs etti. Mektep oqıwshalar menen ótkerilgen búgingi iláj muzmunlı hám qızıqlı bolıp juwmaqlandı.