“Qaraqalpaq ádebiyatın bilesiz be?” atamasında sáwbetlesiw keshesi shólkemlestirildi.

• admin
• 23-December-2025
• 85

Usı jıldıń 19-dekabr kúni, Taqıyatas rayonı Málimleme-kitapxana orayı Abonementler hám paydalanıwshılarǵa xızmet kórsetiw xızmeti qánigesi A.Abieva tárepinen Taqıyatas rayonı Mektepke shekemgi hám mektep bilimlendiriw bólimine qaraslı 2-sanlı mektep kitapxanasında Qaraqalpaq jazıwshı hám shayırlarınıń kitaplarınan “Qaraqalpaq ádebiyatın bilesiz be?” atamasında sáwbetlesiw keshesi shólkemlestirildi. Sáwbetke 2-sanlı mektep kitapxanashısı K.Ibragimova hám kitapqumarlar qatnastı.

Búgin biz ázeliy hám bay tariyxqa iye bolǵan qaraqalpaq ádebiyatı haqqında sóz etemiz. Qaraqalpaq ádebiyatı – xalıqtıń turmıs tárizi, arzıw-niyetleri, dárti hám quwanıshın sáwlelendiretuǵın biybaha ruwxıy ǵáziyne. Qaraqalpaq ádebiyatınıń tamırları awızeki xalıq dóretiwshiligine barıp taqaladı. Ertekler, dástanlar, qosıqlar, naqıl-maqallar xalıqtıń ásirler dawamında toplagan danıshpanlıǵın bildiredi. Ásirese, “Qırıq qız,” “Alpamıs” sıyaqlı dástanlar xalqımızdıń mártlik, watansúyiwshilik hám sadıqlıq haqqındaǵı túsiniklerin jarıtıp beredi.

XIX ásirge kelip qaraqalpaq jazba ádebiyatı qáliplesti. Bul dáwirde ádebiyat tek kórkem emes, al aǵartıwshılıq wazıypanı da atqara basladı. Usı jerde qaraqalpaq ádebiyatınıń tiykarın salıwshısı esaplanǵan Berdaqtıń atın ayrıqsha atap ótiw kerek. Onıń shıǵarmalarında xalıq táǵdiri, ádillik, erkinlik hám ruwxıylıq máseleleri joqarı kórkem sheberlik penen sáwlelendirilgen.